Shumë njerëz ndihen në siklet vetëm nga ideja për të përdorur tualetin e punës. Sondazhet tregojnë se rreth një e treta e punonjësve hezitojnë të kryejnë nevojat në ambientet e zyrës dhe gati 20% e shmangin plotësisht këtë gjë. Arsyet variojnë nga mungesa e privatësisë, frika nga era apo zhurmat, deri te sikleti psikologjik.
Megjithatë, ekspertët thonë se me disa zakone të thjeshta mund të krijoni një orar të qëndrueshëm të jashtëqitjes, duke u çliruar nga stresi i tualetit të punës.
“Jo të gjithë kanë luksin e një jashtëqitjeje si me orë biologjike,” shpjegon gastroenterologia Dr. Leybelis Padilla, themeluese e ‘Unlocking GI’. “Por ka disa zakone të rëndësishme që ju vendosin në ritmin e duhur çdo mëngjes.”
Sipas saj, jashtëqitja e rregullt nuk është rastësi, por rezultat i kombinimit të disa zakoneve të shëndetshme.
“Trupi krijon ritme të brendshme kur ushqimi, hidratimi, lëvizja dhe stresi menaxhohen siç duhet. Edhe momenti kur ju shkoni në tualet bëhet pjesë e këtij ritmi,” thekson Padilla.
Çdo gjë lidhet jo vetëm me komoditetin e mëngjesit, por edhe me shëndetin afatgjatë. Studimet sugjerojnë se numri i jashtëqitjeve lidhet me rrezikun për sëmundje kronike, dhe rezultatet më të mira shëndetësore shfaqen te personat që defekojnë 1 deri në 2 herë në ditë, e njohur si “zona Goldilocks”.
Fibra ushqimore është elementi kyç. Ajo i jep masë feçeve, i zbut dhe i ndihmon të kalojnë më lehtë nga zorra. Në të njëjtën kohë, fibra funksionon si një “furçë natyrale”, duke pastruar mbetje dhe baktere në zorrë.
Sidoqoftë, studimet tregojnë se rreth 95% e amerikanëve nuk marrin sasinë e rekomanduar ditore të fibrave.
“Jemi një popull i uritur për fibër,” thotë Padilla. “Mungesa e saj prish ritmin e tretjes dhe cilësinë e jashtëqitjes.”
Sasia varet nga mosha dhe gjinia, por rekomandimi minimal është rreth 25 gram fibra në ditë. Arritja e kësaj sasie është e thjeshtë, mjafton një smoothie me proteina, farat chia dhe miell liri, që janë të pasura me fibër.
Një tjetër sekret për jashtëqitje të rregullt është uji.
“Zgjohuni dhe pini ujë. Jo kafe,” thotë doktorja.
Edhe pse për disa persona kafeja ka efekt laksativ, uji mbetet thelbësor për të shmangur kapsllëkun dhe për të zbutur masën fekale.
“Kafeja është diuretik dhe mund t’ju heqë lëngje që ditën ta filloni të dehidratuar,” shpjegon ajo. “Një gotë ujë është starti ideal.”
Aktiviteti fizik është një tjetër faktor që ndihmon ndjeshëm.
“Nëse trupi lëviz, lëviz edhe sistemi tretës,” thotë Padilla.
Nuk është e nevojshme një vrapim apo stërvitje e vështirë. Edhe disa pozicione të thjeshta yoga ndihmojnë lëvizjen e zorrëve dhe nxisin refleksin e jashtëqitjes.
Pozicionet më të dobishme për këtë janë:
rrotullimi i shtyllës ulur
“forward fold” në këmbë
përkulja përpara ulur
“yoga squat”
gjunjët drejt gjoksit
Shumë njerëz vërejnë se pas këtyre pozicioneve, ndodh një jashtëqitje natyrale.
Padilla shpjegon se jashtëqitja është si gjurma e gishtit, e ndryshme për çdo person.
Ritmi i zorrëve ndikohet nga mikrobioma e zorrëve, nga emocionet, stresi, ushqimi, hidratimi, zakonet e gjumit madje edhe mendimet.
Por me tre zakone të thjeshta, më shumë fibra, një gotë ujë në mëngjes dhe pak lëvizje mund të vendosni rutinën tuaj, dhe të kryeni nevojat para se të nisni ditën e punës, pa shqetësimin e tualetit në zyrë.
