Familjarët e emigrantit shqiptar Alfred Dosku kërkojnë hetime nga autoritetet angleze për vdekjen e tij.
37-vjeçari shqiptar vdiq në spitalin në Redhill, Surrey, më 17 nëntor 2023 pasi u gjet i varur me çarçafë nga stafi i qendrës së imigracionit.
Kushërira e shqiptarit, Ledisa Hysa Dosku kërkon zbardhjen e ngjarjes së rëndë dhe përgjigje për shumë pikëpyetje që ajo dhe familjarët kanë.
“Duam vetëm të dimë se çfarë ka ndodhur”.
Ajo tha se kushëriri i saj ishte "shumë i zgjuar", duke shtuar se familja nuk e kupton se si ai përfundoi në qendrën e imigracionit.
“Bisedën e fundit e kishte me vëllain, ai ishte mirë dhe gati të kthehej. Ishte gati të bashkohej me familjen”.
Sipas saj, vdekja e shqiptarit ishte "plotësisht e pakuptueshme".
Pas dyshimeve që familjarët kanë hedhur, autoritetet angleze kanë vendosur nisjen e hetimeve. Në pyetje do merren edhe stafi i i kujdesit shëndetësor që priti Doskun kur ai mbërriti në spital.
Hetimi është planifikuar të zhvillohet brenda dhjetorit të këtij viti në një datë që do të vendoset në vijim.