Më shumë gjak në kantiere dhe një tjetër shqiptar viktimë në vendin e punës.
Përparim Tafa, një punëtor 57-vjeçar, banues në Martinengo, ka ndërruar jetë pasditen e 11 prillit në një kantier ndërtimi në Piacenza, Itali.
Punëtori shqiptar humbi jetën pasi u shtyp nga një panel kontrolli që po instalonte në një kantier ndërtimi në periferi të qytetit Emilian, në via Deledda.
Përpjekjet e shpëtimit nga kolegët e pranishëm ishin të padobishme. Kur ambulanca mbërriti në vendngjarje, mjekët konfirmuan vdekjen dhe policët nisën hetimet.
Sindikata e punëtorëve në Piacenza ka mbajtur një demonstratë për të rritur ndërgjegjësimin për vdekjet në punë. Sindikalistët kishin vendosur nëntë kryqe rreth një monumenti kushtuar të vrarëve në punë për të simbolizuar viktimat në punë nga viti 2023 deri më sot në Piacenza, të cilat tani janë bërë dhjetë.
Sindikatat kërkuan "siguri në punë, reformë më të drejtë tatimore dhe një model të ri të të bërit biznes".
