Edhe pse Shqipëria fitoi ndeshjen ndaj Polonisë që u luajt në stadiumin “Air Albania”, UEFA nuk ka toleruar ato që ndodhën në fushë dhe jo vetëm.
Ditën e sotme UEFA ka gjobitur me 44 mijë euro FSHF-në për hedhjen e flakadanëve dhe sendeve të tjera në fushë si dhe bllokimin e rrugëve publike.
Gjithashtu UEFA ka urdhëruar mbylljen me kusht të tribunave pas portës në “Air Albania” për takimin e radhës.
Kështu UEFA ka vendosur:
• Të gjobisë Federatën Shqiptare të Futbollit me 30,000 euro dhe të urdhërojë mbylljen e pjesshme të stadiumit të Federatës Shqiptare të Futbollit (pra e gjithë tribunës veriore dhe jugore) gjatë ndeshjes së ardhshme të kompeticionit të UEFA-s në të cilën Federata Shqiptare e Futbollit luan si pritëse, për ndezjen e fishekzjarrëve, hedhjen e sendeve dhe aktet e dëmtimit. Mbyllja e pjesshme e stadiumit në fjalë pezullohet për një periudhë prove prej dy (2) vitesh, duke filluar nga data e këtij vendimi.
• Të gjobisë Federatën Shqiptare të Futbollit me 14,000 euro për bllokimin e rrugëve publike.
• Të paralajmërojë Federatën Shqiptare të Futbollit për sjelljen e pahijshme të skuadrës së saj.
• Të paralajmërojë Federatën Shqiptare të Futbollit për reklamimin e ndaluar të sponsorëve në çanta.
• Të paralajmërojë Federatën Shqiptare të Futbollit për mosrespektimin e kërkesave minimale mjekësore.
• Të paralajmërojë Federatën Shqiptare të Futbollit për organizimin e pamjaftueshëm dhe moszbatimin e një strategjie të duhur të ndarjes së biletave.
• Të paralajmërojë Federatën Shqiptare të Futbollit për mediat e paautorizuara në fushë.
