Policia spanjolle ka arrestuar ditën e sotme tre lojtarë të rinj të Real Madridit për shpërndarjen e një videoje seksuale me një të mitur.
Arrestimi i tyre erdhi pas një ankese të paraqitur nga nëna e një vajze 16-vjeçare në Ishujt Kanarie lidhur me një video seksuale. Sipas policisë vajza pohoi se marrëdhëniet ishin konsensuale, regjistrimi u bë në qershor pa pëlqimin e saj dhe këtë e kishte marrë vesh së fundmi.
Policia tha se të tre lojtarët ishin arrestuar në kompleksin sportiv të Real Madridit në Madrid dhe një lojtar i katërt ishte duke u hetuar. Një nga të arrestuarit është një lojtar rezervë dhe dy luajnë për ekipin e tretë.
Real Madridi lëshoi një deklaratë duke thënë vetëm se gjithsej katër lojtarë të ekipit të të rinjve ishin marrë në pyetje nga policia "në lidhje me një ankesë për publikimin e njē videoje private përmes sistemit të mesazheve WhatsApp".
Sipas gazetës El Confidencial, subjekti kryesor i hetimit është një lojtar i ekipit të tretë, i cili dyshohet se ka regjistruar marrëdhënien e tij seksuale me viktimën 16-vjeçare.
Lojtarët të cilët nuk janë të mitur u lanë të lirë pas një vendimi gjyqësor dhe pasi u sekuestruan të dhënat në celularët e tyre.