Zbardhen prapaskenat e vendosjes së tritolit në fasonerinë e një shtetasi italian në zonën Freskut në Tiranë pak kohë më parë. Mësohet se Edmond Arapi nga Himara, i cili është porositësi i tritolit, i kishte vënë gjobë 100 mijë euro biznesmenit italian.
46-vjeçari mësohet se është me precedent të mëparshëm penal, i akuzuar për plagosje. Arapi e ka kërcënuar disa herë italianin që t’i jepte paratë, por ky i fundit ka refuzuar dhe më pas 46-vjeçari organizoi vënien e tritolit në hyrjen e biznesit të italianit.
Arapi kontaktoi 16-vjeçarin, i cili më pas ka vjedhur një biçikletë. Ndërkohë, Arapi i ka siguruar edhe sasinë e tritolit të miturit, duke i premtuar 1 milion lekë të vjetra për t’i vendosur tritolin fasonerisë së italianit.
Pas vendosjes së tritolit autori 16-vjeçar dhe porositësi janë larguar për t’u fshehur, ku i mituri u arrestua në Valias, ndërsa Edmond Arapi në Himarë. Ka qenë pikërisht i mituri, ai që ka nxjerrë emrin e Arapit, duke pranuar se 46-vjeçari i kishte premtuar se do ta paguante për vënien e tritolit.
