Një i ri është mbytur mesditën e sotme në lumin Mat. Në njoftimin zyrtar, Policia ka bërë të ditur se 22-vjeçari është mbytur në vendin e quajtur “Ura e Zogut”, mbi lumin Mat.
Sipas informacioneve , 22-vjeçari nga Fushë-Miloti, po peshkonte në lumë. Raportohet se në një moment, ai ka hyrë të lahet dhe nuk ka dalë më.
Është e nevojshme ndërhyrja e polumbarëve, për nxjerrjen e trupit. Forca policore dhe ambulanca ndodhen në vendin e ngjarjes.
Informacion paraprak:
Në lumin Mat, në territorin e njësisë administrative Zejmen, në vendin e quajtur "Ura me harqe", shtetasi V. N., 22 vjeç, banues në Milot, dyshohet se gjatë peshkimit me shokët e tij, aksidentalisht ka rënë në lumë dhe e ka marrë rrjedha.
Në vendngjarje kanë shkuar shërbimet e Policisë dhe skuadra e polumbarëve e Repartit Special RENEA, të cilët kanë filluar kërkimet për gjetjen e 22-vjeçarit.
Grupi hetimor, në drejtimin e Prokurorisë, po pyesin në cilësinë e personave që kanë dijeni për rrethanat e ngjarjes, shokët e shtetasit V. N. që kanë qenë bashkë me të, me qëllim sqarimin e plotë të ngjarjes.