Presidenti i Afrikës së Jugut Cyril Ramaphosa paralajmëroi të enjten kundër rrezikut të "aparteidit shëndetësor" pasi shumë vende nga e gjithë bota kanë pezulluar fluturimet drejt vendit të tij që kur u zbulua varianti i ri i Covid, i njohur si Omicron. Gjatë një vizite në Bregun e Fildishtë, ai tha se kufizimet, të cilat shumë vende i kanë aplikuar, ishin "të padrejta dhe joshkencore".
“Duke pasur parasysh se ishin vetë shkencëtarët tanë afrikanë që zbuluan për herë të parë variantin Omicron, është gjithashtu një shuplakë përballë përsosmërisë dhe ekspertizës afrikane. Këto ndalime do të shkaktojnë dëme të pallogaritshme, veçanërisht në industritë e udhëtimit dhe turizmit që mbështesin bizneset dhe mjetet e jetesës në Afrikën e Jugut dhe rajonin e Afrikës Jugore" ”-tha Ramaphosa pas takimit me homologun e tij të Bregut të Fildishtë, Alassane Ouattara.
Ai bëri thirrje për një "garanci globale" për të siguruar që vaksinat dhe trajtimet për COVID-19 "të prodhohen dhe të vihen në dispozicion lirisht dhe në mënyrë të barabartë për të gjithë njerëzit". Shkencëtarët e Afrikës së Jugut njoftuan më 25 nëntor se kishin zbuluar një formë shumë të mutuar të koronavirusit. Varianti që atëherë është raportuar në shumë vende të tjera, duke përfshirë Europën, Indinë dhe SHBA. Tre vende të tjera afrikane si Botsvana, Gana dhe Nigeria, kanë regjistruar disa raste.
Burimi: alarabiya.net | Përktheu dhe Përshtati: JOQ Albania
