Një vjedhje masive ndodhi dy ditë më parë në Gjirin e Lalëzit, ku "pre" ranë shtatë shtëpi, mes të cilave ajo e kreut të Prokurorisë së Posaçme kundër Krimit të Organizuar dhe Korrupsionit (SPAK), Arben Kraja. Rrethanat e vjedhjes nuk bëhen të ditura, ndërkohë burime për "Albanian Post", bëjnë me dije se në shtatë shtëpitë ka pasur prani policore për të zbardhur vjedhjen. Ende nuk është e qartë nëse shtëpia e Krajës ka qenë e planifikuar apo ka ndodhur rastësisht. Sakaq Policia e Durrësit nuk ka dhënë një njoftim zyrtar për ngjarjen. Banorët e zonës raportojnë se kjo nuk është hera e parë që kryhen vjedhje, pasi vetëm pak ditë më parë u vodhën tre ose katër shtëpi.
Një prej dëshmitarëve ka thënë se grabitësit janë futur nga dritarja, dhe së bashku me familjarët ai ka shkuar në banesë rreth orës 02.30 të natës, ku ka vënë re se një prej dritareve ka qenë e hapur. Atij i janë vjedhur paratë nga portofoli dhe disa sende me vlerë, ndërsa kartat e ndryshme janë hedhur në oborrin e shtëpisë.
