Përplasje mes banorëve të Baldushkut dhe policisë për pallatet e reja, një gruaje i bie të fikët

Mëngjesin e sotëm banorët e Baldushkut kanë dalë për të protestuar pasi kundërshtojnë me forcë ndërtimin e pallateve të reja në truallin ku ata jetojnë. Banorët janë përplasur me efektivë të forcave të policisë së rendit dhe asaj bashkiake pasi e konsiderojnë qesharak dëmshpërblimin që iu është premtuar dhe sipas tyre trualli është trashëgimi nga të parët. Gjatë kësaj përplasje një gruaje i ka rënë të fikët, ndërsa banorët u shprehën se bashkia do të ndërtojë 52 vila dhe jo pallate për të strehuar të dëmtuarit nga tërmeti.

E jona, e jona është toka, e kemi tokën e trashëguar, që në vitin 1938, është skandal, nuk funksionon gjykata. Na kanë vrarë me gjithë sa jemi, nuk japin asnjë shpjegim. Këtu do të bëhen 52 vila, këtu ka banorë. Çfarë është kjo hata kështu mo, a ka më turp mo, kemi 30 vite që punojmë. Rri mos më prekni me dorë fare se jam në të drejtën time, hiqni duart, se jam në pronën time, hajdutë. Çfarë është kjo hata e zezë që bëhet kështu. Këto nuk pyesin për gjyq, kemi që në vitin 2019 që e kemi çuar në gjykatë çështjen.