Dy ditë më parë këngëtarja e njohur Zaimina Vasjari u emërua specialiste në drejtorinë e Ujësjellës Kanalizimit në Durrës, në degën e Shijakut. Lajmi në fjalë bëri bujë në media, ndërsa sipas dokumentit që bëri xhiron e rrjetit Zaimina është emëruar në këtë detyrë më 10 qershor të këtij viti duke marrë përsipër të zgjidhë të gjitha problemet e komunitetit të Shijakut për ujin e pijshëm. Mirëpo, mesa duket këto lajme këngëtaren nuk e kanë shqetësuar aspak, teksa ka vazhduar pushimet e saj normalisht pa e “prishur terezinë”.
Së fundmi, ajo së bashku me familjen kanë vendosur që këtë fundjavë ta kalojnë në bregdetin shqiptar dhe këtë gjë e ka zbuluar vetë Zaimina përmes disa videove. Ky është reagimi i parë i këngëtares që prej bërjes publike të lajmit, reagim përmes të cilit kuptohet qartë se këngëtarja nuk është shqetësuar aspak dhe nuk i ka bërë përshtypje lajmi që “bombardoi” portalet ditëve të fundit.