Më 24 shtator në Amerikë çmimi i naftës ra ndjeshëm dhe kapi vlerën që ka pasur përpara se të niste lufta Rusi-Ukrainë. E ndonëse në Amerikë çmimi u ul, në Shqipëri çmimi i këtij karburanti mbeti i pandryshuar dhe i shtrenjtë. Nga data 24 shtator deri në datë 28 shtator shqiptarët falë bordit të Ramës e blenë naftën me 223 lekë/litri, benzinën me 194 lekë për litër dhe gazin 78 lekë për litër. Mirëpo pas datës 28 shtator, Bordi tregoi dhe njëherë se po rrjep xhepat e shqiptarëve duke ua shitur karburantet me çmimin që duan dhe jo me atë që pasqyrohet në Bursë e cila ka rënë ndjeshëm. Pas datës 28 shtator, shqiptarët e morën naftën me 219 lekë/litri, benzinën 195 lekë/litri dhe gazin 78 lekë për litër. E duke iu gëzuar faktit që e uli me 4 lekë, ulje qesharake krahasuar me çmimet në Bursë, sot Bordi i kryeministrit ka ndryshuar përsëri çmimin e karburanteve duke rritur përsëri naftën me 10 lekë dhe benzinën me 8 lekë litri. Pra nga sot naftën shqiptarët do e blenë me 229 lekë/litri dhe benzinën me 203 lekë/litri.
Njoftimi i Bordit:
Vendimet e Bordit të Transparencës në datë 29 Shtator 2022, janë si rezultat i levizjes së çmimeve në bursën Platts Mediteran, ku rritja vjen për shkak të rritjes së faktoreve : 1. Gazoil rritja në bursë +68 usd ton nga data 26 Shtator. 2.Benzina rritja në bursë + 60 usd nga data 26 Shtator. 3.kursi dollarit nga + 1.63 pikë nga data 26 Shtator kur ishte mbledhja e fundit e bordit.
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 229 lekë/litri, ndërsa i shitjes me shumicë jo më shumë se 217 lekë/litër. Çmimi i shitjes me pakicë i nënproduktit benzinë e standardit SSH EN të jetë jo më shumë se 203 lekë/litri,ndërsa i shitjes me shumicë jo më shumë se 191 lekë/litër. Çmimi i shitjes me pakicë i nënproduktit gaz, të jetë 78 lekë/litri me pakicë dhe i shitjes me shumicë 66 lekë/litër për automjetet. ( Shënim: çmimi i shitjes për gazin e lëngshëm të automjeteve do të jetë çmimi i furnizimit në stacionet e furnizimit në pikat e karburanteve, ndërkohë që në pikat e tjera për konsumatorët familjarë dhe industrial çmimi nuk duhet të përfshijë akcizën).
????Çmimet e caktuara nga Bordi do të hynë në fuqi sot datë 29 shtator ora 20:00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që ne krijimin e tij i është përmbajtur me përpikëmëri në vendimet e tij lëvizjes së bursës Platts të Mesdheut për gazoilin,benzinën, si dhe faturave zyrtare të operatoreve.
Ministria e Financës ndjen detyrimin të sqaroj opinionin publik se jo çdo lëvizje e bursës së naftës bruto reflektohet në të njëjtën kohë dhe në të njejtën masë në bursën e gazoilit dhe benzinës.
Theksojmë se Bordi nuk cakton çmimet e naftës Bruto, por të gazoilit, benzinës dhe gazit të lëngshëm sipas standardeve të përcaktuara në Aktin Normativ.
Bordi ka caktuar vetëm marzhet bruto maksimale për shitjen me shumicë dhe pakicë, me të cilat operatorët duhet të mbulojnë të gjitha shpenzimet operative. Pra, vendimet që merr bordi dhe ndryshimi i çmimeve të shitjes lidhet vetem me ndryshimet në bursën Platts të Mesdheut për gazoilin dhe benzinës, pra jo të bursës së naftës bruto, si dhe në lëvizjen e kursit të dollarit.
Gjithë elementët e tjerë që formojnë çmimin janë fikse dhe për këto bordi nuk merr vendim.
Ministria e Financave dhe Ekonomisë është e angazhuar në mbrojtje të interesave të konsumatorëve shqiptarë dhe ruajtjes së parimeve të konkurencës së ndershme në treg.
Situata që po kalojmë nuk është zakontë, ndaj dhe vendimet që marrim, vijnë si përgjigjje e zhvillimeve të ekonomisë vendase, por edhe e lëvizjeve të tregjeve ndërkombëtare.
Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtëj vendimi.
