Ndeshja e sotme ndaj Lazios ishte e fundit për Giorgio Chiellinin me fanellën e Juventusit.
Mbrojtësi italian ka mbyllur sot karrierën e tij si futbollisti "Zonjës së Vjetër" duke i dhënë dhe lamtumirën tifozëve bardhezi.
Chiellini ishte titullar në këtë duel, por në minutën e 17 të takimit, Alegri bëri shenjë për zëvendësimin e tij.
Gjithçka e programuar, pasi ishte një zëvendësim simbolik për mbrojtësin i cili ka luajtur pikërisht për 17 vite me ngjyrat bardhezi e tashmë do t’i japë lamtumirën përfundimisht.
Ai i la vendin në fushë De Ligt, teksa i dorëzoi shiritin e kapitenit Paulo Dybalës, i cili gjithashtu pritet të largohet.
Më pas, ai bëri një xhiro rreth fushës së lojës, duke përshëndetur në çdo cep të stadiumit tifozët e shumtë që nuk ndalën së kënduari në kor emrin e tij.
