Parkimi në Tiranë është bërë tepër i vështirë, madje një sfidë më vete. Kjo ndodh jo vetëm në rrugët kryesore por edhe brenda lagjeve. Por akoma më e vështirë bëhet situata kur ke ndonjë emergjencë shëndetësore dhe koha nuk pret që të gjesh një parkim. Në një situatë të tillë është gjendur një qytetar në Tiranë, i cili kishte një emergjencë mjekësore dhe u detyrua të parkojë makinën tek hyrja e Qendrës Shëndetësore Nr. 9 pranë Rrugës së Kavajës në Tiranë.
Por menjëherë sapo u fut brenda qendrës, askush nuk e mori vesh se nga doli një polic i cili i vendosi gjobë për parkim të gabuar. Duket se policia rri dhe fshihet pas ndonjë cepi pallati në pritje të gjynafqarëve që fati i keq i ka bërë të kërkojnë ndihmën e mjekut. Të paktën një gjë të tillë ta bënin edhe me hajdutët, pasi vetëm në ditët e fundit vjedhjet e dyqaneve janë rritur në mënyrë të frikshme në Tiranë.
